andhere ke aaghosh mein wo chhupa hai

añdhere ke āġhosh meñ vo chhupā hai

ujālā samay kā mahak to rahā hai

jo takiya ho bhīgī samajh lo ishāre

bilakte bilakte koī so gayā hai

tabāhī ke aalam meñ hañstā sitārā

ka.ī mushkiloñ se chahak kar milā hai

muqaddas ho sīrat bhale chāhe jitnī

farebī sī sūrat ko sab kuchh ravā hai

na dāman pasārā na sar thā jhukāyā

na shikva kisī se na koī gila hai

sahī baat kahte hamesha haiñ Darte

ye sach kā safīna ufuq se girā hai

nahīñ chāhiye raushnī ab falak kī

charāġhoñ sā man sab taraf se khulā hai

lage saath bhārī khule āsmāñ meñ

qafas se nikal bandishoñ se ghirā hai

kyoñ lipTā vo chādar meñ be-fikr ho kar

gunāhoñ kā khātā adhūrā paḌā hai

shajar rūThā rahtā hai har-vaqt dekho

nahīñ koī arse se aa kar rukā hai

sabhī se hai rishta koī be-zabāñ sā

ḳharāba makāñ jaisā lagne lagā hai

muqaddar ke chābuk se pūchho zarā ab

chaman se havā kyā abhī bhī judā hai

musalsal hai hotī yahāñ par jo bārish

to phir kyoñ mirā kūcha sūkhā paḌā hai

ye jhūToñ kī hastī ghulī hai fazā meñ

haqīqat pe dekho kyoñ pardā paḌā hai

andhere ke aaghosh mein wo chhupa hai

ujala samay ka mahak to raha hai

jo takiya ho bhigi samajh lo ishaare

bilakte bilakte koi so gaya hai

tabahi ke aalam mein hansta sitara

kai mushkilon se chahak kar mila hai

muqaddas ho sirat bhale chahe jitni

farebi si surat ko sab kuchh rawa hai

na daman pasara na sar tha jhukaya

na shikwa kisi se na koi gila hai

sahi baat kahte hamesha hain Darte

ye sach ka safina ufuq se gira hai

nahin chahiye raushni ab falak ki

charaghon sa man sab taraf se khula hai

lage sath bhaari khule aasman mein

qafas se nikal bandishon se ghira hai

kyon lipTa wo chadar mein be-fikr ho kar

gunahon ka khata adhura paDa hai

shajar ruTha rahta hai har-waqt dekho

nahin koi arse se aa kar ruka hai

sabhi se hai rishta koi be-zaban sa

KHaraba makan jaisa lagne laga hai

muqaddar ke chabuk se puchho zara ab

chaman se hawa kya abhi bhi juda hai

musalsal hai hoti yahan par jo barish

to phir kyon mera kucha sukha paDa hai

ye jhuTon ki hasti ghuli hai faza mein

haqiqat pe dekho kyon parda paDa hai