andoh se hui na rihai tamam shab

andoh se huī na rihā.ī tamām shab

mujh dil-zada ko niiñd na aa.ī tamām shab

jab maiñ shurū qissa kiyā āñkheñ khol diiñ

yaanī thī mujh ko chasm-numā.ī tamām shab

chashmak chalī ga.ī thī sitāroñ kī sub.h tak

kī āsmāñ ne dīda-darā.ī tamām shab

baḳht-e-siyah ne der meñ kal yāvarī sī kī

thī dushmanoñ se us ko laḌā.ī tamām shab

baiThe hī guzrī vaade kī shab vo na aa phirā

iizā ajab tarah kī uThā.ī tamām shab

sanñāhaTeñ se dil se guzar jaa.eñ so kahāñ

bulbul ne go kī nāla-sarā.ī tamām shab

taare se merī palkoñ pe qatre sarishk ke

dete rahe haiñ 'mīr' dikhā.ī tamām shab

andoh se hui na rihai tamam shab

mujh dil-zada ko nind na aai tamam shab

jab main shuru qissa kiya aankhen khol din

yani thi mujh ko chasm-numai tamam shab

chashmak chali gai thi sitaron ki subh tak

ki aasman ne dida-darai tamam shab

baKHt-e-siyah ne der mein kal yawari si ki

thi dushmanon se us ko laDai tamam shab

baiThe hi guzri wade ki shab wo na aa phira

iza ajab tarah ki uThai tamam shab

sannahaTen se dil se guzar jaen so kahan

bulbul ne go ki nala-sarai tamam shab

tare se meri palkon pe qatre sarishk ke

dete rahe hain 'mir' dikhai tamam shab