anginat zaKHm kai dagh zamane ke mile

anginat zaḳhm ka.ī daaġh zamāne ke mile

kitne unvān hameñ ek fasāne se mile

yuuñ to har-gām zamāne ne hameñ Thukrāyā

phir bhī ham tere liye saare zamāne se mile

ehtirāman tire qadmoñ pe luTā.e aksar

jitne motī bhī hameñ dil ke ḳhazāne se mile

tuur par jalva-numā.ī kī huī rasm adā

vo hameñ dil kī taraf aañkh uThāne se mile

yaad hai itnā mulāqāt huī thī un se

ye nahīñ yaad ki vo kis ke bahāne se mile

rāh-e-hamvār pe insān bhaTak jaate haiñ

manzil-e-dil ke nishāñ Thokareñ khāne se mile

baat vo hai ki jo bigḌe to asar paidā ho

tiir vo hai jo ḳhatā ho ke nishāne se mile

dil jo TuuTā to khule ruuh pe asrār-e-jamāl

kitne sūraj hameñ ik sham.a bujhāne se mile

jaan de kar hī milā dost kā paiġhām 'tufail'

vo hameñ āḳhirī dīvār girāne se mile

anginat zaKHm kai dagh zamane ke mile

kitne unwan hamein ek fasane se mile

yun to har-gam zamane ne hamein Thukraya

phir bhi hum tere liye sare zamane se mile

ehtiraman tere qadmon pe luTae aksar

jitne moti bhi hamein dil ke KHazane se mile

tur par jalwa-numai ki hui rasm ada

wo hamein dil ki taraf aankh uThane se mile

yaad hai itna mulaqat hui thi un se

ye nahin yaad ki wo kis ke bahane se mile

rah-e-hamwar pe insan bhaTak jate hain

manzil-e-dil ke nishan Thokaren khane se mile

baat wo hai ki jo bigDe to asar paida ho

tir wo hai jo KHata ho ke nishane se mile

dil jo TuTa to khule ruh pe asrar-e-jamal

kitne suraj hamein ek shama bujhane se mile

jaan de kar hi mila dost ka paigham 'tufail'

wo hamein aaKHiri diwar girane se mile