anjuman mein unki dil par iKHtiyar aasan nahin

anjuman meñ un kī dil par iḳhtiyār āsāñ nahīñ

mushkiloñ kā merī kar lenā shumār āsāñ nahīñ

har nafas hai ek sharh-e-dard-hā-e-ārzū

dāstān-e-zindagī kā iḳhtisār āsāñ nahīñ

ātishīñ aahoñ ke tinkoñ se banā hai āshiyāñ

ḳhaak karnā is ko barq-e-sho'la-bār āsāñ nahīñ

tauba kartā mai-kade meñ baiTh kar mumkin magar

tauba pahlū meñ tire jān-e-bahār āsāñ nahīñ

kyoñ na iksīr-e-mohabbat dahr meñ nāyāb ho

dil kā honā terī ḳhāk-e-rahguzar āsāñ nahīñ

ho ga.iiñ nākāmiyāñ ġhārat-gar-e-duniyā-e-yās

maut se bhī ab to honā ham-kinār āsāñ nahīñ

ḳhaak chhāno ab 'nazar' dasht-e-junūn-e-'ishq kī

husn kī duniyā meñ rahnā hoshiyār āsāñ nahīñ

anjuman mein un ki dil par iKHtiyar aasan nahin

mushkilon ka meri kar lena shumar aasan nahin

har nafas hai ek sharh-e-dard-ha-e-arzu

dastan-e-zindagi ka iKHtisar aasan nahin

aatishin aahon ke tinkon se bana hai aashiyan

KHak karna is ko barq-e-sho'la-bar aasan nahin

tauba karta mai-kade mein baiTh kar mumkin magar

tauba pahlu mein tere jaan-e-bahaar aasan nahin

kyon na iksir-e-mohabbat dahr mein nayab ho

dil ka hona teri KHak-e-rahguzar aasan nahin

ho gain nakaamiyan ghaarat-gar-e-duniya-e-yas

maut se bhi ab to hona ham-kinar aasan nahin

KHak chhano ab 'nazar' dasht-e-junun-e-'ishq ki

husn ki duniya mein rahna hoshiyar aasan nahin