anokha rup dhaara hai nirala qad nikala hai

anokhā ruup dhārā hai nirālā qad nikālā hai

zarā sī shāḳh ne kaisā baḌā bargad nikālā hai

ḳhushāmad karne vaale ke hukūmat haath aa.ī hai

jo apnī jaan par khelā use sarhad nikālā hai

hazāroñ meñ kisī ik aadh ko duniyā atā key hai

hamāre vāste us ne yahī fīsad nikālā hai

ki us ko sūjhtī rahtī hai apnī sī chalāne kī

kahīñ tabrez bhejā hai kahīñ sarmad nikālā hai

bahut āsān hai allāh ko manzar badal denā

abhī masnad-nashīnī hai abhī masnad nikālā hai

ahad meñ miim rakhā hamd se pahle alif rakhā

ajab andāz se allāh ne ahmad nikālā hai

kamānā aur khānā aish karnā aur mar jaanā

nahīñ 'momin' agar jiine kā ye maqsad nikālā hai

anokha rup dhaara hai nirala qad nikala hai

zara si shaKH ne kaisa baDa bargad nikala hai

KHushamad karne wale ke hukumat hath aai hai

jo apni jaan par khela use sarhad nikala hai

hazaron mein kisi ek aadh ko duniya ata key hai

hamare waste us ne yahi fisad nikala hai

ki us ko sujhti rahti hai apni si chalane ki

kahin tabrez bheja hai kahin sarmad nikala hai

bahut aasan hai allah ko manzar badal dena

abhi masnad-nashini hai abhi masnad nikala hai

ahad mein mim rakha hamd se pahle alif rakha

ajab andaz se allah ne ahmad nikala hai

kamana aur khana aish karna aur mar jaana

nahin 'momin' agar jine ka ye maqsad nikala hai