apna ghar chhoD ke hum log wahan tak pahunche

apnā ghar chhoḌ ke ham log vahāñ tak pahuñche

sub.h-e-fardā kī kiran bhī na jahāñ tak pahuñche

maiñ ne āñkhoñ meñ chhupā rakkhe haiñ kuchh aur charāġh

raushnī sub.h kī shāyad na yahāñ tak pahuñche

be-kahe baat samajh lo to munāsib hogā

is se pahle ki yahī baat zabāñ tak pahuñche

tum ne ham jaise musāfir bhī na dekhe hoñge

jo bahāroñ se chale aur ḳhizāñ tak pahuñche

aaj pindār-e-tamannā kā fusūñ TuuT gayā

chand kam-zarf gile nok-e-zabāñ tak pahuñche

apna ghar chhoD ke hum log wahan tak pahunche

subh-e-farda ki kiran bhi na jahan tak pahunche

main ne aankhon mein chhupa rakkhe hain kuchh aur charagh

raushni subh ki shayad na yahan tak pahunche

be-kahe baat samajh lo to munasib hoga

is se pahle ki yahi baat zaban tak pahunche

tum ne hum jaise musafir bhi na dekhe honge

jo bahaaron se chale aur KHizan tak pahunche

aaj pindar-e-tamanna ka fusun TuT gaya

chand kam-zarf gile nok-e-zaban tak pahunche