apna milan kisi ki dili bad-dua bhi hai

apnā milan kisī kī dilī bad-duā bhī hai

ya.anī hamārā vasl hamārī sazā bhī hai

al-muḳhtasar tumhārī mahak oḌhte hue

ehsās ho gayā ki use phailnā bhī hai

is par Thahar sake to Thahar chal sake to chal

ye dil qayām-gāh bhī hai rāsta bhī hai

achchhā tirī nazar meñ bahut muḳhtalif huuñ maiñ

ya.anī tirī nazar meñ koī dūsrā bhī hai

saarī hisoñ kī Dor samā.at ko sauñp kar

us dil pe kaan rakh ki ḳhudā boltā bhī hai

tujh se ḳhushī ġhamī kā tafarqe miTā ki tū

ik ḳhush-gavār yaad bhī hai sāneha bhī hai

har ek dāstān ke har ek moḌ par

'hāris' ye sochnā kabhī aisā huā bhī hai

apna milan kisi ki dili bad-dua bhi hai

yani hamara wasl hamari saza bhi hai

al-muKHtasar tumhaari mahak oDhte hue

ehsas ho gaya ki use phailna bhi hai

is par Thahar sake to Thahar chal sake to chal

ye dil qayam-gah bhi hai rasta bhi hai

achchha teri nazar mein bahut muKHtalif hun main

yani teri nazar mein koi dusra bhi hai

sari hison ki Dor samaat ko saunp kar

us dil pe kan rakh ki KHuda bolta bhi hai

tujh se KHushi ghami ka tafarqe miTa ki tu

ek KHush-gawar yaad bhi hai saneha bhi hai

har ek dastan ke har ek moD par

'haaris' ye sochna kabhi aisa hua bhi hai