apne adhure KHwab ki tabir khinch li

apne adhūre ḳhvāb kī tā'bīr khīñch lī

āñkhoñ ne kū-e-yār kī tasvīr khīñch lī

shāḳh-e-shajar se khiltā huā phuul toḌ kar

maalī ne gul se husn kī tāsīr khīñch lī

bal khā ke zulf-e-yār yuuñ chehre pe aa girī

jaise ki shahsavār ne shamshīr khīñch lī

munsif kā 'adl dekhiye zardār ke liye

ġhurbat-zada ke haath se jāgīr khīñch lī

āñkhoñ se merī hazrat-e-yāqūb ne kahā

yūsuf tirī judā.ī ne tanvīr khīñch lī

bilkul safed ho ga.e mere siyāh baal

ayyām-e-ġham ne raunaq-e-taqdīr khīñch lī

us ke sipurd kar ke ujāloñ kī anjuman

'mehvar' ne apnī samt shab-e-tīr khīñch lī

apne adhure KHwab ki ta'bir khinch li

aankhon ne ku-e-yar ki taswir khinch li

shaKH-e-shajar se khilta hua phul toD kar

mali ne gul se husn ki tasir khinch li

bal kha ke zulf-e-yar yun chehre pe aa giri

jaise ki shahsawar ne shamshir khinch li

munsif ka 'adl dekhiye zardar ke liye

ghurbat-zada ke hath se jagir khinch li

aankhon se meri hazrat-e-yaqub ne kaha

yusuf teri judai ne tanwir khinch li

bilkul safed ho gae mere siyah baal

ayyam-e-gham ne raunaq-e-taqdir khinch li

us ke sipurd kar ke ujalon ki anjuman

'mehwar' ne apni samt shab-e-tir khinch li