apne alfaz-o-maani se nikal aaya hai

apne alfāz-o-ma'ānī se nikal aayā hai

vo kahānī kī ravānī se nikal aayā hai

khīñch laa.ī hai hameñ chāñdnī shab meñ ḳhushbū

saañp bhī raat kī raanī se nikal aayā hai

ḳhud ko rū-posh kiyā kitne hī kirdāroñ meñ

phir bhī fankār kahānī se nikal aayā hai

jaag uTThī hai taḌap duur chale jaane se

rāsta naql-e-makānī se nikal aayā hai

phuuT bahne lage Thokar se phaphole dil ke

dard ehsās ke paanī se nikal aayā hai

tajrabe bāñdh ke gaThḌī meñ rakhe kāñdhoñ par

ik buḌhāpā bhī javānī se nikal aayā hai

hikmateñ fikr-o-tadabbur meñ rakhī haiñ 'jāzib'

falsafa sho'la-bayānī se nikal aayā hai

apne alfaz-o-ma'ani se nikal aaya hai

wo kahani ki rawani se nikal aaya hai

khinch lai hai hamein chandni shab mein KHushbu

sanp bhi raat ki rani se nikal aaya hai

KHud ko ru-posh kiya kitne hi kirdaron mein

phir bhi fankar kahani se nikal aaya hai

jag uTThi hai taDap dur chale jaane se

rasta naql-e-makani se nikal aaya hai

phuT bahne lage Thokar se phaphole dil ke

dard ehsas ke pani se nikal aaya hai

tajrabe bandh ke gaThDi mein rakhe kandhon par

ek buDhapa bhi jawani se nikal aaya hai

hikmaten fikr-o-tadabbur mein rakhi hain 'jazib'

falsafa sho'la-bayani se nikal aaya hai