apne andar ki jo hairani se bahar aate

apne andar kī jo hairānī se bāhar aate

roz-marra kī pareshānī se bāhar aate

jīte-jī toḌte kis tarah tilism-e-vahshat

kaise is ġhūl-e-bayābānī se bāhar aate

ḳhud pe kyā aur bhī khulne kī tamannā karte

ya.anī ham aur bhī uryānī se bāhar aate

toḌte ek hī tiilī qafas-e-hijr kī ham

ek hī halqa-e-zindānī se bāhar aate

naḳhl-e-iz.hār kī ham bunte kabhī sabz qabā

ik na.ī sūrat-e-imkānī se bāhar aate

muntazir kaun sā thā shahr-e-tarab jis ke liye

ham kabhī dasht kī vīrānī se bāhar aate

kaun se goshe meñ phir miltā sukūñ 'yāvar' ko

vo agar terī nigahbānī se bāhar aate

apne andar ki jo hairani se bahar aate

roz-marra ki pareshani se bahar aate

jite-ji toDte kis tarah tilism-e-wahshat

kaise is ghul-e-bayabani se bahar aate

KHud pe kya aur bhi khulne ki tamanna karte

yani hum aur bhi uryani se bahar aate

toDte ek hi tili qafas-e-hijr ki hum

ek hi halqa-e-zindani se bahar aate

naKHl-e-izhaar ki hum bunte kabhi sabz qaba

ek nai surat-e-imkani se bahar aate

muntazir kaun sa tha shahr-e-tarab jis ke liye

hum kabhi dasht ki virani se bahar aate

kaun se goshe mein phir milta sukun 'yawar' ko

wo agar teri nigahbani se bahar aate