apne andar panah mushkil hai

apne andar panāh mushkil hai

yā'nī ḳhud se nibāh mushkil hai

tere jhāñse meñ phir se aa.eñ ham

ab to 'ālam-panāh mushkil hai

ek to aable haiñ paañv meñ

ik tire ghar kī raah mushkil hai

thak chukā huuñ maiñ ab ġhanīm mire

ab tirī vaah vaah mushkil hai

ek to be-ġharaz mohabbat ho

aur ho be-panāh mushkil hai

vo jo palte haiñ āstīnoñ meñ

hoñ kabhī ḳhair-ḳhvāh mushkil hai

us kī zulfoñ kā rang hai varna

shab ho itnī siyāh mushkil hai

saaf bātin na ho to murshid kī

ham pe koī nigāh mushkil hai

husn-e-be-parda dekh kar 'arshad'

na ho phir bhī gunāh mushkil hai

apne andar panah mushkil hai

ya'ni KHud se nibah mushkil hai

tere jhanse mein phir se aaen hum

ab to 'alam-panah mushkil hai

ek to aable hain panw mein

ek tere ghar ki rah mushkil hai

thak chuka hun main ab ghanim mere

ab teri wah wah mushkil hai

ek to be-gharaz mohabbat ho

aur ho be-panah mushkil hai

wo jo palte hain aastinon mein

hon kabhi KHair-KHwah mushkil hai

us ki zulfon ka rang hai warna

shab ho itni siyah mushkil hai

saf baatin na ho to murshid ki

hum pe koi nigah mushkil hai

husn-e-be-parda dekh kar 'arshad'

na ho phir bhi gunah mushkil hai