apne andar se jo bahar nikle

apne andar se jo bāhar nikle

ḳhud-numā.ī kā samundar nikle

ab sazā.eñ hī muqaddar Thahrīñ

tāziyānoñ ke sanā-gar nikle

aise bhī log haiñ is shahr meñ jo

dhuup meñ barf pahan kar nikle

fāḳhtāoñ kā tamasḳhur tauba

chiyūñTiyoñ ke bhī ajab par nikle

haath jab qabza-e-shamshīr pe ho

kyuuñ na maqtal meñ dilāvar nikle

khīñch do daar pe dil-dāroñ ko

shahryāroñ kā zarā Dar nikle

jis bhī dīvār meñ dar kartā huuñ

vahī dīvār pas-e-dar nikle

kashtiyāñ chhoḌ ke dariyāoñ meñ

regzāroñ se shanāvar nikle

āñdhiyoñ meñ bhī khaḌe haiñ ab tak

ham daraḳhtoñ se qad-āvar nikle

bhiik us shahr meñ ham kyā māñgeñ

jis ke hātim bhī gadāgar nikle

paañv meñ bāñdh ke ghuñghrū 'mohsin'!

chand qabroñ ke mujāvir nikle

apne andar se jo bahar nikle

KHud-numai ka samundar nikle

ab sazaen hi muqaddar Thahrin

taziyanon ke sana-gar nikle

aise bhi log hain is shahr mein jo

dhup mein barf pahan kar nikle

faKHtaon ka tamasKHur tauba

chiyunTiyon ke bhi ajab par nikle

hath jab qabza-e-shamshir pe ho

kyun na maqtal mein dilawar nikle

khinch do dar pe dil-daron ko

shahryaron ka zara Dar nikle

jis bhi diwar mein dar karta hun

wahi diwar pas-e-dar nikle

kashtiyan chhoD ke dariyaon mein

regzaron se shanawar nikle

aandhiyon mein bhi khaDe hain ab tak

hum daraKHton se qad-awar nikle

bhik us shahr mein hum kya mangen

jis ke hatim bhi gadagar nikle

panw mein bandh ke ghunghru 'mohsin'!

chand qabron ke mujawir nikle