apne chaman pe abr ye kaisa baras gaya

apne chaman pe abr ye kaisā baras gayā

har qatra zahr ban ke fazāoñ meñ bas gayā

sūd-o-ziyāñ kī fikr kā kis ko rahā dimāġh

muddat huī ki hausla-e-pesh-o-pas gayā

ab jāgte haiñ apnī hī aahaT se qāfile

rāh-e-talab se sheva-e-bāñg-e-jaras gayā

ik sail-e-rañg-o-nūr se jal-thal hai kā.enāt

kaisā ye tere jalvoñ kā bādal baras gayā

dikhlā.eñ ham shikastagī-e-bāl-o-par kise

kahte haiñ log mausam-e-qaid-e-qafas gayā

chāragaro ye zahr utāro to baat hai

tārīkiyoñ kā naag zamāne ko Das gayā

naqsh-e-qadam kā bhī koī miltā nahīñ surāġh

chupke se dil meñ aa ke mire kaun bas gayā

har lamha zindagī se 'ibārat thā jin dinoñ

kyā kyā na ham se le ke vo daur-e-havas gayā

'hurmat' ye dil hai apnī tabāhī pe jis ko naaz

vo phuul hai jo khilne se pahle bikas gayā

apne chaman pe abr ye kaisa baras gaya

har qatra zahr ban ke fazaon mein bas gaya

sud-o-ziyan ki fikr ka kis ko raha dimagh

muddat hui ki hausla-e-pesh-o-pas gaya

ab jagte hain apni hi aahaT se qafile

rah-e-talab se shewa-e-bang-e-jaras gaya

ek sail-e-rang-o-nur se jal-thal hai kaenat

kaisa ye tere jalwon ka baadal baras gaya

dikhlaen hum shikastagi-e-baal-o-par kise

kahte hain log mausam-e-qaid-e-qafas gaya

chaaragaro ye zahr utaro to baat hai

tarikiyon ka nag zamane ko Das gaya

naqsh-e-qadam ka bhi koi milta nahin suragh

chupke se dil mein aa ke mere kaun bas gaya

har lamha zindagi se 'ibarat tha jin dinon

kya kya na hum se le ke wo daur-e-hawas gaya

'hurmat' ye dil hai apni tabahi pe jis ko naz

wo phul hai jo khilne se pahle bikas gaya