apne dil-e-muztar ko betab hi rahne do

apne dil-e-muztar ko betāb hī rahne do

chalte raho manzil ko nāyāb hī rahne do

tohfe meñ anokhā zaḳhm hālāt ne baḳhshā hai

ehsās kā ḳhuuñ de kar shādāb hī rahne do

vo haath meñ aatā hai aur haath nahīñ aatā

sīmāb-sifat paikar sīmāb hī rahne do

gahrā.ī meñ ḳhatroñ kā imkāñ to ziyāda hai

dariyā-e-ta.alluq ko pāyāb hī rahne do

ye mujh pe karam hogā hisse meñ mire ai dost

iḳhlās o muravvat ke ādāb hī rahne do

ib.hām kā parda hai tashkīk kā hai aalam

tum zauq-e-tajassus ko betāb hī rahne do

mat jaao qarīb us ke tum ek gahan ban kar

āñgan meñ use apnā mahtāb hī rahne do

jab tak vo nahīñ aatā ik ḳhvāb-e-hasīñ ho kar

tum apne shabistāñ ko be-ḳhvāb hī rahne do

vo barf kā toda yā patthar nahīñ ban jaa.e

har qatra-e-ashk-e-ġham sailāb hī rahne do

vo bahr-e-fanā meñ ḳhud Duubā hai to achchhā hai

filhāl 'zafar' us ko ġharqāb hī rahne do

apne dil-e-muztar ko betab hi rahne do

chalte raho manzil ko nayab hi rahne do

tohfe mein anokha zaKHm haalat ne baKHsha hai

ehsas ka KHun de kar shadab hi rahne do

wo hath mein aata hai aur hath nahin aata

simab-sifat paikar simab hi rahne do

gahrai mein KHatron ka imkan to ziyaada hai

dariya-e-talluq ko payab hi rahne do

ye mujh pe karam hoga hisse mein mere ai dost

iKHlas o murawwat ke aadab hi rahne do

ibham ka parda hai tashkik ka hai aalam

tum zauq-e-tajassus ko betab hi rahne do

mat jao qarib us ke tum ek gahan ban kar

aangan mein use apna mahtab hi rahne do

jab tak wo nahin aata ek KHwab-e-hasin ho kar

tum apne shabistan ko be-KHwab hi rahne do

wo barf ka toda ya patthar nahin ban jae

har qatra-e-ashk-e-gham sailab hi rahne do

wo bahr-e-fana mein KHud Duba hai to achchha hai

filhaal 'zafar' us ko gharqab hi rahne do