apne hi ghar ke fard agar dushmani karen

apne hī ghar ke fard agar dushmanī kareñ

kis āsare pe ham ye basar zindagī kareñ

yaaro qadam qadam pe añdhere haiñ hukmrān

sūraj kidhar ugā.eñ kahāñ raushnī kareñ

laḌvā rahe haiñ raam ko jo bhī rahīm se

in maz.habī ḳhudāoñ se kyā dostī kareñ

ai dosto tanāv meñ jiinā harām hai

had se baḌheñ jo zulm to ham sar-kashī kareñ

ārām ke vasīle to lākhoñ jahāñ meñ haiñ

dil kā sukūn chāhiye to bandagī kareñ

kitnā aziim dars rasūl-e-ḳhudā kā hai

dushman se bhī milāp kareñ āshtī kareñ

zulmat ye vo nahīñ hai jo sūraj se duur ho

apnā hī dil jalā ke chalo raushnī kareñ

ghuT hī na jaa.e dam kahīñ dil ke ġhubār se

'anvār' zinda rahnā hai to shā.irī kareñ

apne hi ghar ke fard agar dushmani karen

kis aasare pe hum ye basar zindagi karen

yaro qadam qadam pe andhere hain hukmran

suraj kidhar ugaen kahan raushni karen

laDwa rahe hain ram ko jo bhi rahim se

in mazhabi KHudaon se kya dosti karen

ai dosto tanaw mein jina haram hai

had se baDhen jo zulm to hum sar-kashi karen

aaram ke wasile to lakhon jahan mein hain

dil ka sukun chahiye to bandagi karen

kitna azim dars rasul-e-KHuda ka hai

dushman se bhi milap karen aashti karen

zulmat ye wo nahin hai jo suraj se dur ho

apna hi dil jala ke chalo raushni karen

ghuT hi na jae dam kahin dil ke ghubar se

'anwar' zinda rahna hai to shairi karen