apne hi kisi sae se Takraya hun phir bhi

apne hī kisī saa.e se Takrāyā huuñ phir bhī

mahsūs ye hotā hai yahāñ aaya huuñ phir bhī

kāġhaz pe siyāhī kī tarah phail rahā huuñ

ye harf-e-nadāmat nahīñ sharmāyā huuñ phir bhī

har-chand safar dard ke dariyā kā safar thā

sāhil ke kisī ḳhvāb se ghabrāyā huuñ phir bhī

sāġhar meñ sar-e-shām lahū merā milā hai

ik nashsha-e-be-nām meñ lahrāyā huuñ phir bhī

har-chand kisī jītne vaale ne sadā dī

haare hue logoñ meñ chalā aaya huuñ phir bhī

milte hī rahe zaḳhm mirī kisht-e-badan ko

ehsās ke har phuul kā sarmāya huuñ phir bhī

sūraj ke muqābil thā 'zafar' dasht-e-sahar meñ

maiñ pyaas ke sahrā meñ koī saayā huuñ phir bhī

apne hi kisi sae se Takraya hun phir bhi

mahsus ye hota hai yahan aaya hun phir bhi

kaghaz pe siyahi ki tarah phail raha hun

ye harf-e-nadamat nahin sharmaya hun phir bhi

har-chand safar dard ke dariya ka safar tha

sahil ke kisi KHwab se ghabraya hun phir bhi

saghar mein sar-e-sham lahu mera mila hai

ek nashsha-e-be-nam mein lahraya hun phir bhi

har-chand kisi jitne wale ne sada di

haare hue logon mein chala aaya hun phir bhi

milte hi rahe zaKHm meri kisht-e-badan ko

ehsas ke har phul ka sarmaya hun phir bhi

suraj ke muqabil tha 'zafar' dasht-e-sahar mein

main pyas ke sahra mein koi saya hun phir bhi