apne hi sae mein tha mein shayad chhupa hua

apne hī saa.e meñ thā meñ shāyad chhupā huā

jab ḳhud hī haT gayā to kahīñ rāsta milā

jalte rahe haiñ apne hī dozaḳh meñ raat din

ham se ziyāda koī hamārā adū na thā

dekhā na phir palaT ke kisī shahsavār ne

maiñ har sadā kā naqsh-e-qadam khojtā rahā

dīvār phāñd kar na yahāñ aa.egā koī

rahne do zaḳhm-e-dil kā darīcha khulā huā

niklā agar to haath na ā.ūñgā phir kabhī

kab se huuñ is badan kī kamāñ meñ tanā huā

bedār haiñ shu.ūr kī kirneñ kahīñ kahīñ

har zehn meñ hai vahm kā tārīk rāsta

jū-e-nashāt ban ke bahā le ga.ī mujhe

āvāz thī ki sāz-e-javānī kā aks thā

itnā bhī kaun hogā halāk-e-fareb-e-rañg

shab us ne mai jo pī hai to mujh ko nasha huā

'fāriġh' havā.e dard ne lauTā diyā jise

aa.egā ek din mirā ghar pūchhtā huā

apne hi sae mein tha mein shayad chhupa hua

jab KHud hi haT gaya to kahin rasta mila

jalte rahe hain apne hi dozaKH mein raat din

hum se ziyaada koi hamara adu na tha

dekha na phir palaT ke kisi shahsawar ne

main har sada ka naqsh-e-qadam khojta raha

diwar phand kar na yahan aaega koi

rahne do zaKHm-e-dil ka daricha khula hua

nikla agar to hath na aaunga phir kabhi

kab se hun is badan ki kaman mein tana hua

bedar hain shuur ki kirnen kahin kahin

har zehn mein hai wahm ka tarik rasta

ju-e-nashat ban ke baha le gai mujhe

aawaz thi ki saz-e-jawani ka aks tha

itna bhi kaun hoga halak-e-fareb-e-rang

shab us ne mai jo pi hai to mujh ko nasha hua

'farigh' hawae dard ne lauTa diya jise

aaega ek din mera ghar puchhta hua