apne liye nahin na zamane ke waste

apne liye nahīñ na zamāne ke vāste

sab kaam kar rahe haiñ dikhāne ke vāste

jitne anā-parast haiñ mahfil meñ un se ham

hargiz uThe na haath milāne ke vāste

ham se tamāsh-gāh-e-jahāñ kā na haal pūchh

ronā paḌā hai sab ko hañsāne ke vāste

kandhe pe le chale haiñ aqārib uThā ke laash

'ujlat meñ zer-e-ḳhāk dabāne ke vāste

āñgan meñ farsh Dhaal ke miTTī ko laa.e haiñ

shohrat-pasand peḌ lagāne ke vāste

har gaam pūchhtā hai vo ab merā hāl-chāl

sāzish lage hai mujh ko miTāne ke vāste

qīmat batā rahā thā har ik chiiz kī mujhe

laayā to thā vo ghar ko dikhāne ke vāste

bhūkā thā ik faqīr mire dar pe aur mire

ghar meñ nahīñ thā kuchh bhī khilāne ke vāste

'rānā' ke saath kahne lagā hai har ek shaḳhs

sāzish huī hai bastī jalāne ke vāste

apne liye nahin na zamane ke waste

sab kaam kar rahe hain dikhane ke waste

jitne ana-parast hain mahfil mein un se hum

hargiz uThe na hath milane ke waste

hum se tamash-gah-e-jahan ka na haal puchh

rona paDa hai sab ko hansane ke waste

kandhe pe le chale hain aqarib uTha ke lash

'ujlat mein zer-e-KHak dabane ke waste

aangan mein farsh Dhaal ke miTTi ko lae hain

shohrat-pasand peD lagane ke waste

har gam puchhta hai wo ab mera haal-chaal

sazish lage hai mujh ko miTane ke waste

qimat bata raha tha har ek chiz ki mujhe

laya to tha wo ghar ko dikhane ke waste

bhuka tha ek faqir mere dar pe aur mere

ghar mein nahin tha kuchh bhi khilane ke waste

'rana' ke sath kahne laga hai har ek shaKHs

sazish hui hai basti jalane ke waste