apne liye raha kabhi uske raha KHilaf

apne liye rahā kabhī us ke rahā ḳhilāf

merā mizāj sab ke liye ek sā ḳhilāf

aise bhī yaar hotā hai koī bhalā ḳhilāf

hotī hai juuñ charāġh ke yaaro havā ḳhilāf

ham log karte aa.e haiñ us kī muḳhālifat

kis ke huā hai aaj talak vo ḳhudā ḳhilāf

ā.īna nāqisoñ ko dikhāyā hai jab kabhī

phir kaise kaise ho ga.e haiñ pārsā ḳhilāf

maiñ ne kahā ki ishq ibādat hai dosto

mujh bā-vafā se ho ga.e sab bevafā ḳhilāf

sach bol ke batā tujhe 'irshād' kyā milā

sab āshnā ḳhilāf haiñ nā-āshnā ḳhilāf

'irshād' dekhiye to mire saath hai magar

kambaḳht vo hamesha hī mere rahā ḳhilāf

'irshād' saath rahte haiñ ban kar jahāñ meñ dost

dushman hue haiñ jab se huī hai havā ḳhilāf

apne liye raha kabhi us ke raha KHilaf

mera mizaj sab ke liye ek sa KHilaf

aise bhi yar hota hai koi bhala KHilaf

hoti hai jun charagh ke yaro hawa KHilaf

hum log karte aae hain us ki muKHalifat

kis ke hua hai aaj talak wo KHuda KHilaf

aaina naqison ko dikhaya hai jab kabhi

phir kaise kaise ho gae hain parsa KHilaf

main ne kaha ki ishq ibaadat hai dosto

mujh ba-wafa se ho gae sab bewafa KHilaf

sach bol ke bata tujhe 'irshad' kya mila

sab aashna KHilaf hain na-ashna KHilaf

'irshad' dekhiye to mere sath hai magar

kambaKHt wo hamesha hi mere raha KHilaf

'irshad' sath rahte hain ban kar jahan mein dost

dushman hue hain jab se hui hai hawa KHilaf