apne pahlu mein chhupae hue patthar nikla

apne pahlū meñ chhupā.e hue patthar niklā

ye tirā shahr bhī tujh sā hī sitamgar niklā

thī jo mahfūz mire saath mirī ḳhāk-e-badan

le uḌī tez havā ghar se jo bāhar niklā

sab kī goyā.ī pe haavī thī mirī ḳhāmoshī

kaun mujh sā tirī mahfil meñ suḳhanvar niklā

shahr meñ phailā huā ḳhauf-e-shanāsā.ī thā

ghar se har shaḳhs nayā ruup badal kar niklā

kis taraf jāoge ab pyaas bujhāne logo

dasht-e-be-āb se aage to samundar niklā

ban ga.ī paañv kī zanjīr dar-o-bām kī yaad

ḳhud mirī raah kī dīvār mirā ghar niklā

kī mohabbat bhī to ik dushman-e-jāñ se 'ḳhāvar'

apnā dushman na koī tere barābar niklā

apne pahlu mein chhupae hue patthar nikla

ye tera shahr bhi tujh sa hi sitamgar nikla

thi jo mahfuz mere sath meri KHak-e-badan

le uDi tez hawa ghar se jo bahar nikla

sab ki goyai pe hawi thi meri KHamoshi

kaun mujh sa teri mahfil mein suKHanwar nikla

shahr mein phaila hua KHauf-e-shanasai tha

ghar se har shaKHs naya rup badal kar nikla

kis taraf jaoge ab pyas bujhane logo

dasht-e-be-ab se aage to samundar nikla

ban gai panw ki zanjir dar-o-baam ki yaad

KHud meri rah ki diwar mera ghar nikla

ki mohabbat bhi to ek dushman-e-jaan se 'KHawar'

apna dushman na koi tere barabar nikla