apne se gurezan kabhi aghyar se barham

apne se gurezāñ kabhī aġhyār se barham

mānind bagūloñ ke haiñ ab garm-e-safar ham

phirte haiñ tire shahr meñ be-yār-o-madadgār

gard-e-rah-e-manzil kī tarah ḳhāk-ba-sar ham

vo raat kisī taur jo kaaTe nahīñ kaTtī

vo raat bhī karte haiñ kisī taur basar ham

allāh rī vāmāñdagī-e-qāfila-e-shām

baiThe rahe tā-sub.h sar-e-rāh-guzar ham

kāñdhoñ pe uThā.e hue ik tohmat-e-yārāñ

jaate haiñ sū-e-dār jhukā.e hue sar ham

phūloñ kī kabhī baat sitāroñ kā kabhī zikr

karte haiñ tujhe yaad ba-andāz-e-digar ham

phir dil ne pukārā hai usī sho.ala-nafas ko

jo ruuh kī taskīn hai aur zaḳhm kā marham

ye jabr-e-mashiyat thā ki dekhā kiye barsoñ

andāz-e-shab-e-tār meñ āsār-e-sahar ham

husn-e-lab-o-gesū ko diyā ham ne nayā naam

'ālam se judā rakhte haiñ andāz-e-nazar ham

ye kāvish-e-afkār matā-e-dil-o-jāñ hai

rakhte haiñ agar kuchh to yahī naqd-e-hunar ham

apne se gurezan kabhi aghyar se barham

manind bagulon ke hain ab garm-e-safar hum

phirte hain tere shahr mein be-yar-o-madadgar

gard-e-rah-e-manzil ki tarah KHak-ba-sar hum

wo raat kisi taur jo kaTe nahin kaTti

wo raat bhi karte hain kisi taur basar hum

allah ri wamandagi-e-qafila-e-sham

baiThe rahe ta-subh sar-e-rah-guzar hum

kandhon pe uThae hue ek tohmat-e-yaran

jate hain su-e-dar jhukae hue sar hum

phulon ki kabhi baat sitaron ka kabhi zikr

karte hain tujhe yaad ba-andaz-e-digar hum

phir dil ne pukara hai usi shoala-nafas ko

jo ruh ki taskin hai aur zaKHm ka marham

ye jabr-e-mashiyat tha ki dekha kiye barson

andaz-e-shab-e-tar mein aasar-e-sahar hum

husn-e-lab-o-gesu ko diya hum ne naya nam

'alam se juda rakhte hain andaz-e-nazar hum

ye kawish-e-afkar mata-e-dil-o-jaan hai

rakhte hain agar kuchh to yahi naqd-e-hunar hum