apne virane ka nuqsan nahin chahta main

apne vīrāne kā nuqsān nahīñ chāhtā maiñ

ya.anī ab dūsrā insān nahīñ chāhtā maiñ

kaT ga.ī jaisī bhī kaTnī thī yahāñ dhuup ke saath

ab kisī saa.e kā ehsān nahīñ chāhtā maiñ

mar rahā huuñ maiñ yahāñ aur vo kahtā hai mujhe

nā-mukammal tirā īmān nahīñ chāhtā maiñ

paas aa kar na baḌhā aur pareshānī-e-dil

phir kisī ishq kā sāmān nahīñ chāhtā maiñ

tū mohabbat meñ yūñhī jaan gañvā baiThegā

jā chalā jā ki tirī jaan nahīñ chāhtā maiñ

chāhtā huuñ ki yahāñ phuul khile hoñ har-sū

ya.anī ye jañg kā maidān nahīñ chāhtā maiñ

maiñ jo chup huuñ to use aap ġhanīmat jāneñ

dekhiye shahr meñ tūfān nahīñ chāhtā maiñ

apne virane ka nuqsan nahin chahta main

yani ab dusra insan nahin chahta main

kaT gai jaisi bhi kaTni thi yahan dhup ke sath

ab kisi sae ka ehsan nahin chahta main

mar raha hun main yahan aur wo kahta hai mujhe

na-mukammal tera iman nahin chahta main

pas aa kar na baDha aur pareshani-e-dil

phir kisi ishq ka saman nahin chahta main

tu mohabbat mein yunhi jaan ganwa baiThega

ja chala ja ki teri jaan nahin chahta main

chahta hun ki yahan phul khile hon har-su

yani ye jang ka maidan nahin chahta main

main jo chup hun to use aap ghanimat jaanen

dekhiye shahr mein tufan nahin chahta main