apni basti chhoD kar pardes mein jaenge kya

apnī bastī chhoḌ kar pardes meñ jā.eñge kyā

yaañ to hai nān-e-javīñ bhī vaañ magar khā.eñge kyā

har taraf ik sang-bārī ghar se nikleñ kis tarah

sar salāmat hī na ho to sar ko sahlā.eñge kyā

apnī apnī fikr sab ko apne apne sab ko ġham

koī mil jaa.e bhī to ab dil ko bahlā.eñge kyā

kaise pichhlī raat guzrī kaise niiñd aa.ī tumheñ

sub.h kā sūraj jo pūchhegā to batlā.eñge kyā

ham bhī the ‘ālī-dimāġh aur ham bhī the ‘ālī-nasab

gar kaheñ apnī zabāñ se log farmā.eñge kyā

apni basti chhoD kar pardes mein jaenge kya

yan to hai nan-e-jawin bhi wan magar khaenge kya

har taraf ek sang-bari ghar se niklen kis tarah

sar salamat hi na ho to sar ko sahlaenge kya

apni apni fikr sab ko apne apne sab ko gham

koi mil jae bhi to ab dil ko bahlaenge kya

kaise pichhli raat guzri kaise nind aai tumhein

subh ka suraj jo puchhega to batlaenge kya

hum bhi the ‘ali-dimagh aur hum bhi the ‘ali-nasab

gar kahen apni zaban se log farmaenge kya