apni hasti se tha KHud main bad-guman kal raat ko

apnī hastī se thā ḳhud maiñ bad-gumāñ kal raat ko

kuchh na thā andesha-e-sūd-o-ziyāñ kal raat ko

chāñdnī barsāt sehn-e-gulsitāñ dilkash havā

thiiñ hujūm-e-ġham meñ ye rangīniyāñ kal raat ko

vus.at-e-taḳh.īl ke halqe meñ thā 'arsh-e-barīñ

dekhtī thiiñ chashm-e-dil kaun-o-makāñ kal raat ko

mil rahe the dast-e-ulfat se mujhe jām-e-sharāb

mehrbāñ thā vo but-e-nā-mehrabāñ kal raat ko

vo mohabbat kī nigāheñ vo mohabbat ke kalām

haañ do-bālā thī adā-e-dil-satāñ kal raat ko

har nazar paiġhām har andāz meñ raqsāñ umiid

aur hī thā us kā tarz-e-imtihāñ kal raat ko

iffat-e-ulfat se thī ā.īna-e-dil kī jilā

varna thā jazbāt kā dariyā ravāñ kal raat ko

zauq se vo sun rahe the dāstān-e-ġham mirī

ho rahā thā inqilāb-e-āsmāñ kal raat ko

dil kī ik āvāz thī is bazm meñ tafsīr-e-ġham

ho chuke the vo bhī majbūr-e-fuġhāñ kal raat ko

tafarqe be-ai.tmādi dushmanī makr-o-fareb

thī tirī tā'bīr ai hindostāñ kal raat ko

so chuke the chand hī ghanToñ meñ arbāb-e-nashāt

sub.h tak thā saath vo ārām-e-jāñ kal raat ko

rañg-e-sahbā chashm-e-nargis meñ thā 'āsī' vaqt-e-sub.h

jāgne se ho rahī thiiñ ḳhūñ-fishāñ kal raat ko

apni hasti se tha KHud main bad-guman kal raat ko

kuchh na tha andesha-e-sud-o-ziyan kal raat ko

chandni barsat sehn-e-gulsitan dilkash hawa

thin hujum-e-gham mein ye ranginiyan kal raat ko

wusat-e-taKHil ke halqe mein tha 'arsh-e-barin

dekhti thin chashm-e-dil kaun-o-makan kal raat ko

mil rahe the dast-e-ulfat se mujhe jam-e-sharab

mehrban tha wo but-e-na-mehraban kal raat ko

wo mohabbat ki nigahen wo mohabbat ke kalam

han do-baala thi ada-e-dil-satan kal raat ko

har nazar paigham har andaz mein raqsan umid

aur hi tha us ka tarz-e-imtihan kal raat ko

iffat-e-ulfat se thi aaina-e-dil ki jila

warna tha jazbaat ka dariya rawan kal raat ko

zauq se wo sun rahe the dastan-e-gham meri

ho raha tha inqilab-e-asman kal raat ko

dil ki ek aawaz thi is bazm mein tafsir-e-gham

ho chuke the wo bhi majbur-e-fughan kal raat ko

tafarqe be-aitmadi dushmani makr-o-fareb

thi teri ta'bir ai hindostan kal raat ko

so chuke the chand hi ghanTon mein arbab-e-nashat

subh tak tha sath wo aaram-e-jaan kal raat ko

rang-e-sahba chashm-e-nargis mein tha 'asi' waqt-e-subh

jagne se ho rahi thin KHun-fishan kal raat ko