apni kaifiyyaten har aan badalti hui sham

apnī kaifiyyateñ har aan badaltī huī shaam

munjamid hotī huī aur pighaltī huī shaam

Dagmagātī huī har-gām sañbhaltī huī shaam

ḳhvāb-gāhoñ se udhar ḳhvāb meñ chaltī huī shaam

gūñdh kar motiye ke haar ghanī zulfoñ meñ

āriz-o-lab pe shafaq surḳhiyāñ maltī huī shaam

ik jhalak poshish-e-be-zabt se 'uryānī kī

de ga.ī din ke nasheboñ se phisaltī huī shaam

ek sannāTā rag-o-pai meñ sadā gūñjtā hai

bujh ga.ī jaise lahū meñ koī jaltī huī shaam

vaqt baptisma kare āb-e-sitāra se use

dast-e-duniyā kī darāzī se nikaltī huī shaam

apni kaifiyyaten har aan badalti hui sham

munjamid hoti hui aur pighalti hui sham

Dagmagati hui har-gam sanbhalti hui sham

KHwab-gahon se udhar KHwab mein chalti hui sham

gundh kar motiye ke haar ghani zulfon mein

aariz-o-lab pe shafaq surKHiyan malti hui sham

ek jhalak poshish-e-be-zabt se 'uryani ki

de gai din ke nashebon se phisalti hui sham

ek sannaTa rag-o-pai mein sada gunjta hai

bujh gai jaise lahu mein koi jalti hui sham

waqt baptisma kare aab-e-sitara se use

dast-e-duniya ki daraazi se nikalti hui sham