apni KHush-fahmi ko idrak samajhne wale

apnī ḳhush-fahmī ko idrāk samajhne vaale

ḳhaak samjheñge mujhe ḳhaak samajhne vaale

ik zarā tez havā se ye garebān khulā

Dar ga.e ḳhud meñ ise chaak samajhne vaale

jaane un ko mire andar kī ḳhabar kaise huī

Thiik samjhe mujhe saffāk samajhne vaale

mere andar se mirā juft numūdār huā

aur shashdar haiñ mujhe taak samajhne vaale

ḳhaak tujh fikr kī tarsīl pe sahrāoñ kī

dīda-e-gul ko bhī namnāk samajhne vaale

maiñ tire jaisā ḳhudā hone se mahfūz rahā

dāġh-e-‘isyāñ se mujhe paak samajhne vaale

dasht-dar-dasht bhaTakte hue dekhe 'tāhir'

ḳhud ko is dahr meñ chālāk samajhne vaale

apni KHush-fahmi ko idrak samajhne wale

KHak samjhenge mujhe KHak samajhne wale

ek zara tez hawa se ye gareban khula

Dar gae KHud mein ise chaak samajhne wale

jaane un ko mere andar ki KHabar kaise hui

Thik samjhe mujhe saffak samajhne wale

mere andar se mera juft numudar hua

aur shashdar hain mujhe tak samajhne wale

KHak tujh fikr ki tarsil pe sahraon ki

dida-e-gul ko bhi namnak samajhne wale

main tere jaisa KHuda hone se mahfuz raha

dagh-e-‘isyan se mujhe pak samajhne wale

dasht-dar-dasht bhaTakte hue dekhe 'tahir'

KHud ko is dahr mein chaalak samajhne wale