apni KHushbu mein apni ada mein rahe

apnī ḳhushbū meñ apnī adā meñ rahe

ham jo apnī hī āb-o-havā meñ rahe

log logoñ se milte bichhaḌte rahe

ham bahut ḳhush rahe ham ḳhudā meñ rahe

ruuh pyāsī rahī ik udāsī rahī

ham jahāñ bhī rahe karbalā meñ rahe

chand lamhe sahī kyā ye kam hai koī

āñsuoñ meñ rahe iltijā meñ rahe

terī ḳhvāhish ko apnī duā kar liyā

is bahāne musalsal duā meñ rahe

āsmānī sahīfoñ kā daura kiyā

ambiyā auliyā ausiyā meñ rahe

aisī arzāniyāñ aisī uryāniyāñ

aur jo is haal meñ bhī hayā meñ rahe

nek-o-bad meñ rahe apnī had meñ rahe

had meñ rahne kā matlab anā meñ rahe

apni KHushbu mein apni ada mein rahe

hum jo apni hi aab-o-hawa mein rahe

log logon se milte bichhaDte rahe

hum bahut KHush rahe hum KHuda mein rahe

ruh pyasi rahi ek udasi rahi

hum jahan bhi rahe karbala mein rahe

chand lamhe sahi kya ye kam hai koi

aansuon mein rahe iltija mein rahe

teri KHwahish ko apni dua kar liya

is bahane musalsal dua mein rahe

aasmani sahifon ka daura kiya

ambiya auliya ausiya mein rahe

aisi arzaniyan aisi uryaniyan

aur jo is haal mein bhi haya mein rahe

nek-o-bad mein rahe apni had mein rahe

had mein rahne ka matlab ana mein rahe