apni pasand chhoD di uski KHarid li

apnī pasand chhoḌ dī us kī ḳharīd lī

virse kā khet bech ke koThī ḳharīd lī

ik umr apne beToñ ko uñglī thamā.ī phir

būḌhe ne ik dukān se lāThī ḳharīd lī

vaise to nirḳh kam hī the gandum ke is baras

aa.ī thī tere gaañv se mahñgī ḳharīd lī

ham dostoñ ke pyaar meñ ham-rañg haiñ libās

aur log kah rahe haiñ ki vardī ḳharīd lī

tasvīr apnī ḳhud hī musavvir ko bhā ga.ī

ḳhud gallery meñ pesh kī ḳhud hī ḳharīd lī

ai hijr-zād tum ko bhī hai ārzū-e-vasl

ai dasht-zād tum ne bhī kashtī ḳharīd lī

dar-asl mas.ala to hai chalnā ghaḌī ke saath

is se ġharaz nahīñ hai ki kaisī ḳharīd lī

apni pasand chhoD di us ki KHarid li

wirse ka khet bech ke koThi KHarid li

ek umr apne beTon ko ungli thamai phir

buDhe ne ek dukan se laThi KHarid li

waise to nirKH kam hi the gandum ke is baras

aai thi tere ganw se mahngi KHarid li

hum doston ke pyar mein ham-rang hain libas

aur log kah rahe hain ki wardi KHarid li

taswir apni KHud hi musawwir ko bha gai

KHud gallery mein pesh ki KHud hi KHarid li

ai hijr-zad tum ko bhi hai aarzu-e-wasl

ai dasht-zad tum ne bhi kashti KHarid li

dar-asl masala to hai chalna ghaDi ke sath

is se gharaz nahin hai ki kaisi KHarid li