apni pursish jo ho arbab-e-wafa se pahle

apnī pursish jo ho arbāb-e-vafā se pahle

māñgiye daulat-e-dīdār ḳhudā se pahle

jhuk gayā vo shah-e-husn aa ke gadā se pahle

ḳham huī zulf-e-dutā qadd-e-dotā se pahle

chashm-e-mushtāq laḌī chashm-e-dotā se pahle

sāmnā hogā balāoñ kā balā se pahle

tū har ik asfal-o-a.alā kā hai razzāq karīm

ustuḳhvāñ sag ko pahuñchtā hai humā se pahle

ba.ad-hū chehra-e-jānāñ ke muqābil ai charḳh

chāñd muñh us ke milā.e kaf-e-pā se pahle

baa'd bhī zikr kiyā ho jo vafādārī kā

sar qalam kījiye shamshīr-e-jafā se pahle

ḳhūn-e-dil hijr meñ piitā huuñ to ġham khātā huuñ

ki davā piite haiñ bīmār ġhizā se pahle

shauq-e-gul sūrat-e-bulbul ḳhatar-e-gulchīñ hai

sub.h-dam baaġh meñ jaatā huuñ sabā se pahle

ġhaflat-e-qalb se zuhhād paḌheñ ba.ad-e-namāz

barhaman sajda kare but ko ḳhudā se pahle

taḳht-e-tābūt ravāñ bhī hai 'ajab taḳht-e-ravāñ

shaah takiye meñ pahuñchtā hai gadā se pahle

misl-e-mūsā mujhe ġhash aa.e na ho tum ko hijāb

vā'da-e-vasl jo iifā ho hayā se pahle

shoḳh ne mehñdī malī haath meñ maiñ qatl huā

rang lā.egā lahū rañg-e-hinā se pahle

pā-e-qātil jo pas-e-marg bhī Thokar maare

nazr sar kījiye taslīm-o-razā se pahle

rū-ba-rū tere huā asfal-o-a.alā kā zuhūr

ilm-e-ḳhāliq meñ tū thā arz-o-samā se pahle

kyā bayāñ rutba-e-a.alā-e-alī ko maiñ karūñ

sair-e-me.arāj kī mahbūb-e-ḳhudā se pahle

dast-gīrī jo hai bande kī ḳhudā ko manzūr

uThte haiñ dast-e-duā 'arsh' du'ā se pahle

apni pursish jo ho arbab-e-wafa se pahle

mangiye daulat-e-didar KHuda se pahle

jhuk gaya wo shah-e-husn aa ke gada se pahle

KHam hui zulf-e-duta qadd-e-dota se pahle

chashm-e-mushtaq laDi chashm-e-dota se pahle

samna hoga balaon ka bala se pahle

tu har ek asfal-o-ala ka hai razzaq karim

ustuKHwan sag ko pahunchta hai huma se pahle

baad-hu chehra-e-jaanan ke muqabil ai charKH

chand munh us ke milae kaf-e-pa se pahle

ba'd bhi zikr kiya ho jo wafadari ka

sar qalam kijiye shamshir-e-jafa se pahle

KHun-e-dil hijr mein pita hun to gham khata hun

ki dawa pite hain bimar ghiza se pahle

shauq-e-gul surat-e-bulbul KHatar-e-gulchin hai

subh-dam bagh mein jata hun saba se pahle

ghaflat-e-qalb se zuhhad paDhen baad-e-namaz

barhaman sajda kare but ko KHuda se pahle

taKHt-e-tabut rawan bhi hai 'ajab taKHt-e-rawan

shah takiye mein pahunchta hai gada se pahle

misl-e-musa mujhe ghash aae na ho tum ko hijab

wa'da-e-wasl jo ifa ho haya se pahle

shoKH ne mehndi mali hath mein main qatl hua

rang laega lahu rang-e-hina se pahle

pa-e-qatil jo pas-e-marg bhi Thokar mare

nazr sar kijiye taslim-o-raza se pahle

ru-ba-ru tere hua asfal-o-ala ka zuhur

ilm-e-KHaliq mein tu tha arz-o-sama se pahle

kya bayan rutba-e-ala-e-ali ko main karun

sair-e-mearaj ki mahbub-e-KHuda se pahle

dast-giri jo hai bande ki KHuda ko manzur

uThte hain dast-e-dua 'arsh' du'a se pahle