apni tarah mujhe bhi zamane mein aam kar

apnī tarah mujhe bhī zamāne meñ aam kar

ai zāt-e-ambarīñ mujhe ḳhushbū maqām kar

un pattharoñ ko raakh na kar soz-e-nutq se

mujh se kalām kar kabhī mujh se kalām kar

sadiyoñ kī maiñ kashīd huuñ ai sāqī-e-azal

mere vajūd ko bhī kabhī sarf-e-jām kar

āzād ho chukā huuñ maiñ qaid-e-havās se

bām-e-nazar se ab mirā baalā maqām kar

mujh ko nishān-e-saltanat-e-be-nishān de

duniyā-e-nām-o-nañg ko be-nañg-o-nām kar

saarā nizām-e-shams kahīñ ye bujhā na de

is soḳhta kiran kā koī intizām kar

aalam meñ hai sabāt faqat merī ruuh ko

mujh meñ samā ke ab koī kār-e-davām kar

koī makīn-e-qarya-e-jāñ tū bhī DhūñDh le

tū bhī 'rashīd' aaj kisī ko salām kar

apni tarah mujhe bhi zamane mein aam kar

ai zat-e-ambarin mujhe KHushbu maqam kar

un pattharon ko rakh na kar soz-e-nutq se

mujh se kalam kar kabhi mujh se kalam kar

sadiyon ki main kashid hun ai saqi-e-azal

mere wajud ko bhi kabhi sarf-e-jam kar

aazad ho chuka hun main qaid-e-hawas se

baam-e-nazar se ab mera baala maqam kar

mujh ko nishan-e-saltanat-e-be-nishan de

duniya-e-nam-o-nang ko be-nang-o-nam kar

sara nizam-e-shams kahin ye bujha na de

is soKHta kiran ka koi intizam kar

aalam mein hai sabaat faqat meri ruh ko

mujh mein sama ke ab koi kar-e-dawam kar

koi makin-e-qarya-e-jaan tu bhi DhunDh le

tu bhi 'rashid' aaj kisi ko salam kar