apni tashhir kare ya mujhe ruswa dekhe

apnī tash.hīr kare yā mujhe rusvā dekhe

vo mire vāste is shahr meñ kyā kyā dekhe

lamha-e-rafta ko āvāz to detī hogī

ā.īna ā.īna jab koī vo mujh sā dekhe

shaam kī āḳhirī sarhad pe mirī tarah koī

apnī barbādī kā ḳhud hī na tamāshā dekhe

apne bachchoñ ko duā detā huuñ ye shaam o sahar

merī hī tarah ye duniyā tumheñ hañstā dekhe

pesh-e-ā.īna maiñ ab us ko sañvartā dekhūñ

sīḌhiyoñ se jo mujhe roz utartā dekhe

kis ne māñgī thī sar-e-shām duā mere liye

aaj kī raat tujhe chāñd na tanhā dekhe

maiñ chalā jā.ūñ to vo der talak khiḌkī se

shaam kī dhund meñ sach-much mirā rastā dekhe

mere ḳhvāboñ kī sadāqat ko zabāñ mil jaa.e

sub.h-dam jūñhī 'ziyā' apnā vo chehrā dekhe

apni tashhir kare ya mujhe ruswa dekhe

wo mere waste is shahr mein kya kya dekhe

lamha-e-rafta ko aawaz to deti hogi

aaina aaina jab koi wo mujh sa dekhe

sham ki aaKHiri sarhad pe meri tarah koi

apni barbaadi ka KHud hi na tamasha dekhe

apne bachchon ko dua deta hun ye sham o sahar

meri hi tarah ye duniya tumhein hansta dekhe

pesh-e-aina main ab us ko sanwarta dekhun

siDhiyon se jo mujhe roz utarta dekhe

kis ne mangi thi sar-e-sham dua mere liye

aaj ki raat tujhe chand na tanha dekhe

main chala jaun to wo der talak khiDki se

sham ki dhund mein sach-much mera rasta dekhe

mere KHwabon ki sadaqat ko zaban mil jae

subh-dam junhi 'ziya' apna wo chehra dekhe