apnon ke sitam yaad na ghairon ki jafa yaad

apnoñ ke sitam yaad na ġhairoñ kī jafā yaad

vo hañs ke zarā bole to kuchh bhī na rahā yaad

kyā lutf uThā.egā jahān-e-guzarāñ kā

vo shaḳhs ki jis shaḳhs ko rahtī ho qazā yaad

ham kaag uḌā dete haiñ botal kā usī vaqt

garmī meñ bhī aa jaatī hai jab kaalī ghaTā yaad

mahshar meñ bhī ham terī shikāyat na kareñge

aa jā.egī us din bhī hameñ shart-e-vafā yaad

pī lī to ḳhudā ek tamāshā nazar aayā

aayā bhī to aayā hameñ kis vaqt ḳhudā yaad

allāh tirā shukr ki ummīd-e-karam hai

allāh tirā shukr ki us ne bhī kiyā yaad

kal tak tire baa.is maiñ use bhūlā huā thā

kyuuñ aane lagā phir se mujhe aaj ḳhudā yaad

apnon ke sitam yaad na ghairon ki jafa yaad

wo hans ke zara bole to kuchh bhi na raha yaad

kya lutf uThaega jahan-e-guzaran ka

wo shaKHs ki jis shaKHs ko rahti ho qaza yaad

hum kag uDa dete hain botal ka usi waqt

garmi mein bhi aa jati hai jab kali ghaTa yaad

mahshar mein bhi hum teri shikayat na karenge

aa jaegi us din bhi hamein shart-e-wafa yaad

pi li to KHuda ek tamasha nazar aaya

aaya bhi to aaya hamein kis waqt KHuda yaad

allah tera shukr ki ummid-e-karam hai

allah tera shukr ki us ne bhi kiya yaad

kal tak tere bais main use bhula hua tha

kyun aane laga phir se mujhe aaj KHuda yaad