aql ka zarf juda hosh ka paimana juda

aql kā zarf judā hosh kā paimāna judā

husn aur ishq kā donoñ se hai afsāna judā

ishq kā bār-e-amānat kahāñ kam-māya kahāñ

diin bulbul kā judā mashrab-e-parvāna judā

dil meñ hai kirmak-e-shab-tāb ke bhī aag nihāñ

lekin is aag se hai sozish-e-parvāna judā

kab bure vaqt meñ hotā hai kisī kā koī

sham.a gul hote hī ho jaatā hai parvāna judā

gulshan-e-dahr meñ jab bū-e-vafā anqā ho

kyā kare gar na rahe sabza-e-begāna judā

ishq-bāzoñ se nahīñ bul-havasoñ ko nisbat

un kā me.aar judā in kā hai paimāna judā

teġh-e-qātil ke rahe sāmne ham sīna-sipar

marte marte na huī himmat-e-mardāna judā

chashm-e-bīnā meñ haiñ ye donoñ jagah manzil-e-yār

na rah-e-ka.aba judā na rah-e-but-ḳhāna judā

zarre zarre meñ hai kaunain ke us kā hī zuhūr

donoñ aalam se hai phir jalva-e-jānāna judā

merī hī āñkhoñ pe ġhaflat kā paḌā thā parda

shāhid-e-husn-e-azal mujh se huā thā na judā

zabt-e-ulfat kahīñ mumkin hai tunak-zarfoñ se

tābish-e-sham.a judā sozish-e-parvāna judā

nāla-e-ātish-e-ġham aur bhaḌak uThtā hai

sham.a ke ho jo tasavvur meñ bhī parvāna judā

hai suḳhan meñ mire ik jiddat-e-tāza 'tālib'

merā mazmūñ judā unvāñ judā afsāna judā

aql ka zarf juda hosh ka paimana juda

husn aur ishq ka donon se hai afsana juda

ishq ka bar-e-amanat kahan kam-maya kahan

din bulbul ka juda mashrab-e-parwana juda

dil mein hai kirmak-e-shab-tab ke bhi aag nihan

lekin is aag se hai sozish-e-parwana juda

kab bure waqt mein hota hai kisi ka koi

shama gul hote hi ho jata hai parwana juda

gulshan-e-dahr mein jab bu-e-wafa anqa ho

kya kare gar na rahe sabza-e-begana juda

ishq-bazon se nahin bul-hawason ko nisbat

un ka mear juda in ka hai paimana juda

tegh-e-qatil ke rahe samne hum sina-sipar

marte marte na hui himmat-e-mardana juda

chashm-e-bina mein hain ye donon jagah manzil-e-yar

na rah-e-kaba juda na rah-e-but-KHana juda

zarre zarre mein hai kaunain ke us ka hi zuhur

donon aalam se hai phir jalwa-e-jaanana juda

meri hi aankhon pe ghaflat ka paDa tha parda

shahid-e-husn-e-azal mujh se hua tha na juda

zabt-e-ulfat kahin mumkin hai tunak-zarfon se

tabish-e-shama juda sozish-e-parwana juda

nala-e-atish-e-gham aur bhaDak uThta hai

shama ke ho jo tasawwur mein bhi parwana juda

hai suKHan mein mere ek jiddat-e-taza 'talib'

mera mazmun juda unwan juda afsana juda