aql ki kuchh kam nahin hai rahbari mere liye

aql kī kuchh kam nahīñ hai rahbarī mere liye

har taraf light hai har-sū raushnī mere liye

ab kahāñ hai husn meñ vo dilkashī mere liye

rah ga.ī hañDiyāñ meñ ḳhālī khurchunī mere liye

ātish-e-qahr-e-ḳhudā dam bhar meñ kar detī hai gul

hai mirī tar-dāmanī ai ''ār-pī'' mere liye

un ke tevar mehrbāñ un kī nigāheñ multafit

de rahī hai zor puurī pārTī mere liye

saikḌoñ jiine meñ laale lākhoñ raḳhne ziist meñ

kirm-ḳhurda ai ḳhudā ye zindagī mere liye

ahl-e-mahshar le ga.e qahr-o-ġhazab sab luuT kar

sirf ik rahmat ḳhudā kī rah ga.ī mere liye

dil meñ rañg-o-roġhan-e-dahqāñ kā rahtā hai ḳhayāl

roz-marra gaañv se aatā hai ghī mere liye

jab maiñ jānūñ ḳhidmat-e-ḳhalq-e-ḳhudā karte haiñ aap

DhūñD diije koī aurat shaiḳh-jī mere liye

shukr hai allāh kā hindostāñ meñ hai qayām

yaañ zanānoñ kī nahīñ hai kuchh kamī mere liye

'shauq' Tapkā paḌ rahā hai rū-e-jānāñ se shabāb

sāmne rakkhī huī hai ras-bharī mere liye

aql ki kuchh kam nahin hai rahbari mere liye

har taraf light hai har-su raushni mere liye

ab kahan hai husn mein wo dilkashi mere liye

rah gai hanDiyan mein KHali khurchuni mere liye

aatish-e-qahr-e-KHuda dam bhar mein kar deti hai gul

hai meri tar-damani ai aar-pi mere liye

un ke tewar mehrban un ki nigahen multafit

de rahi hai zor puri parTi mere liye

saikDon jine mein lale lakhon raKHne zist mein

kirm-KHurda ai KHuda ye zindagi mere liye

ahl-e-mahshar le gae qahr-o-ghazab sab luT kar

sirf ek rahmat KHuda ki rah gai mere liye

dil mein rang-o-roghan-e-dahqan ka rahta hai KHayal

roz-marra ganw se aata hai ghi mere liye

jab main jaanun KHidmat-e-KHalq-e-KHuda karte hain aap

DhunD dije koi aurat shaiKH-ji mere liye

shukr hai allah ka hindostan mein hai qayam

yan zananon ki nahin hai kuchh kami mere liye

'shauq' Tapka paD raha hai ru-e-jaanan se shabab

samne rakkhi hui hai ras-bhari mere liye