arsh tak jo be-KHata jata hai ye wo tir hai

arsh tak jo be-ḳhatā jaatā hai ye vo tiir hai

ġhair samjhā hai ki merī aah be-tāsīr hai

ḳhūgar-e-qaid-e-vafā par khul chukā zindāñ kā raaz

jurm thī vo qaid ye us jurm kī tāzīr hai

be-gunāhī se bhī baḌh kar hai agar koī gunāh

to sazā-e-ishq pā kar ḳhajlat-e-taqsīr hai

chhoḌ merī fikr ġhāfil ro ḳhud apnī qaid par

jis ko tū zevar samajhtā hai vahī zanjīr hai

sijn o jannat donoñ ai kāfir haiñ is duniyā ke naam

vo azal se baḳht-e-momin ye tirī taqdīr hai

daar hī bantī hai ai dil zīna-e-merāj-e-ishq

ḳhvāb-e-āġhāz-e-mohabbat kī yahī tābīr hai

ho na uljhan jab junūn-e-jāma-var kāmil na ho

jab talak dāman hai ḳhār-e-dasht dāman-gīr hai

haath to hoñge qalam par nāma-bar ye bhī kahā

dil churā letī hai pahlū se ye vo tahrīr hai

pā.edārī meñ hai qasroñ se sivā kachchī sī qabr

jo qayāmat tak rahe qaa.im ye vo tāmīr hai

ḳhūn-e-nāhaq kā kisī ke shubah aur tum par magar

sīna-e-'jauhar' meñ dekho to ye kis kā tiir hai

arsh tak jo be-KHata jata hai ye wo tir hai

ghair samjha hai ki meri aah be-tasir hai

KHugar-e-qaid-e-wafa par khul chuka zindan ka raaz

jurm thi wo qaid ye us jurm ki tazir hai

be-gunahi se bhi baDh kar hai agar koi gunah

to saza-e-ishq pa kar KHajlat-e-taqsir hai

chhoD meri fikr ghafil ro KHud apni qaid par

jis ko tu zewar samajhta hai wahi zanjir hai

sijn o jannat donon ai kafir hain is duniya ke nam

wo azal se baKHt-e-momin ye teri taqdir hai

dar hi banti hai ai dil zina-e-meraj-e-ishq

KHwab-e-aghaz-e-mohabbat ki yahi tabir hai

ho na uljhan jab junun-e-jama-war kaamil na ho

jab talak daman hai KHar-e-dasht daman-gir hai

hath to honge qalam par nama-bar ye bhi kaha

dil chura leti hai pahlu se ye wo tahrir hai

paedari mein hai qasron se siwa kachchi si qabr

jo qayamat tak rahe qaim ye wo tamir hai

KHun-e-nahaq ka kisi ke shubah aur tum par magar

sina-e-'jauhar' mein dekho to ye kis ka tir hai