asar aah ka gar dikhaenge hum

asar aah kā gar dikhā.eñge ham

abhī khīñch kar tum ko lā.eñge ham

zarā rah tū ai dasht-e-āvārgī

tirā ḳhuub ḳhāka uḌā.eñge ham

fasāna tirī zulf-e-shab-rañg kā

baḌhegā jahāñ tak baḌhā.eñge ham

vahī dard-e-furqat vahī intizār

bhalā mar ke kyā chain pā.eñge ham

vo gumrāh ġhairoñ ke hamrāh hai

use raah par kyuuñ ki lā.eñge ham

qafas se huā izn-e-parvāz kab

ye ḳhvāhish hī dil se uḌā.eñge ham

tilism-e-mohabbat hai āshiq kā haal

unheñ bhī ye qissa sunā.eñge ham

vo naḳhvat se haiñ āsmāñ se pare

kahāñ se unheñ DhūñDh lā.eñge ham

na kar aah ye shorish-afzā.iyāñ

tujhe bhī kabhī āzmā.eñge ham

na TūTegā sar-rishta-e-iḳhtilāt

vo khīñcheñge jitnā baḌhā.eñge ham

ye maanā ki ho rashk-e-hūr-o-parī

magar ādamiyat sikhā.eñge ham

hazar tīr-e-mizhgāñ kī bochhāḌ se

ye ik dil kahāñ tak bachā.eñge ham

hameñ zahr-o-ḳhanjar kī kyuuñ hai talāsh

shab-e-ġham meñ kyā mar na jā.eñge ham

na niklā koī Dhab to ban kar ġhubār

nazar meñ tumhārī samā.eñge ham

kahāñ ghar meñ muflis ke farsh-o-farosh

vo aa.e to āñkheñ bichhā.eñge ham

tire qad se kī sarv ne ham-sarī

use aaj sīdhā banā.eñge ham

nahīñ ġhusl-e-mayyat kī jā qatl-gāh

magar ḳhāk-o-ḳhūñ meñ nahā.eñge ham

rah-e-ishq se nā-balad hai abhī

ḳhizar ko ye rasta batā.eñge ham

huā vasl bhī to mazā kaun sā

vo rūTheñge har dam manāeñge ham

shab-o-roz dil ko kuredeñ na kyuuñ

yahīñ se patā us kā pā.eñge ham

abas hai ye 'majrūh' tūl-e-amal

bakheḌe ye sab chhoḌ jā.eñge ham

asar aah ka gar dikhaenge hum

abhi khinch kar tum ko laenge hum

zara rah tu ai dasht-e-awargi

tera KHub KHaka uDaenge hum

fasana teri zulf-e-shab-rang ka

baDhega jahan tak baDhaenge hum

wahi dard-e-furqat wahi intizar

bhala mar ke kya chain paenge hum

wo gumrah ghairon ke hamrah hai

use rah par kyun ki laenge hum

qafas se hua izn-e-parwaz kab

ye KHwahish hi dil se uDaenge hum

tilism-e-mohabbat hai aashiq ka haal

unhen bhi ye qissa sunaenge hum

wo naKHwat se hain aasman se pare

kahan se unhen DhunDh laenge hum

na kar aah ye shorish-afzaiyan

tujhe bhi kabhi aazmaenge hum

na TuTega sar-rishta-e-iKHtilat

wo khinchenge jitna baDhaenge hum

ye mana ki ho rashk-e-hur-o-pari

magar aadamiyat sikhaenge hum

hazar tir-e-mizhgan ki bochhaD se

ye ek dil kahan tak bachaenge hum

hamein zahr-o-KHanjar ki kyun hai talash

shab-e-gham mein kya mar na jaenge hum

na nikla koi Dhab to ban kar ghubar

nazar mein tumhaari samaenge hum

kahan ghar mein muflis ke farsh-o-farosh

wo aae to aankhen bichhaenge hum

tere qad se ki sarw ne ham-sari

use aaj sidha banaenge hum

nahin ghusl-e-mayyat ki ja qatl-gah

magar KHak-o-KHun mein nahaenge hum

rah-e-ishq se na-balad hai abhi

KHizar ko ye rasta bataenge hum

hua wasl bhi to maza kaun sa

wo ruThenge har dam manaenge hum

shab-o-roz dil ko kureden na kyun

yahin se pata us ka paenge hum

abas hai ye 'majruh' tul-e-amal

bakheDe ye sab chhoD jaenge hum