asar itna to ho ya-rab hamare jazba-e-dil ka

asar itnā to ho yā-rab hamāre jazba-e-dil kā

baġhair-e-iltijā parda ulaT de koī mahmil kā

jo tum chāho badal jaa.e abhī naqsha mire dil kā

tumheñ mushkil nahīñ āsān karnā merī mushkil kā

ḳhudā jaane ye kis kā ḳhūn-e-nāhaq rang laayā hai

har aañsū surḳh hai jo bah rahā hai sham'-e-mahfil kā

mujhī se kyā hai mere āñsuoñ ke muntazir kyā ho

zarā tum hī palaT do muskurā kar rang mahfil kā

samajh baiThe sukūn-e-ārzī ko mustaqil rāhat

na kyoñ mātam karūñ maiñ ishrat-e-yārān-e-sāhil kā

koī dozaḳh banā.eñge ki vo jannat banā.eñge

ḳhudā jaane kareñge kyā mirī ḳhākistar-e-dil kā

'shifā' ye kasr-e-shān-e-zauq tauhīn-e-nazāra hai

ki un ko dekh kar kyā dekhnā phir māh-e-kāmil kā

asar itna to ho ya-rab hamare jazba-e-dil ka

baghair-e-iltija parda ulaT de koi mahmil ka

jo tum chaho badal jae abhi naqsha mere dil ka

tumhein mushkil nahin aasan karna meri mushkil ka

KHuda jaane ye kis ka KHun-e-nahaq rang laya hai

har aansu surKH hai jo bah raha hai sham'-e-mahfil ka

mujhi se kya hai mere aansuon ke muntazir kya ho

zara tum hi palaT do muskura kar rang mahfil ka

samajh baiThe sukun-e-arzi ko mustaqil rahat

na kyon matam karun main ishrat-e-yaran-e-sahil ka

koi dozaKH banaenge ki wo jannat banaenge

KHuda jaane karenge kya meri KHakistar-e-dil ka

'shifa' ye kasr-e-shan-e-zauq tauhin-e-nazara hai

ki un ko dekh kar kya dekhna phir mah-e-kaamil ka