asar kiya hai ye ai aah-e-na-rasa kaisa

asar kiyā hai ye ai āh-e-nā-rasā kaisā

vo mujh pe raat ko ulTā huā ḳhafā kaisā

jo pochhiye to hai ik rang kā asar ye bhī

hamāre rone pe vo rashk-e-gul hañsā kaisā

butoñ ko duuñ jo maiñ har baat par ḳhudā kī qasam

ye kyā samajhte haiñ yaaro ki hai ḳhudā kaisā

vo din ga.e jo muḳhātib zarā vo hote the

ab un se nāma-o-paiġhām ai sabā kaisā

saqīm-hāl thā kuchh shaam tak to ai 'ārif'

vo raat ko nahīñ ma.alūm hai rahā kaisā

asar kiya hai ye ai aah-e-na-rasa kaisa

wo mujh pe raat ko ulTa hua KHafa kaisa

jo pochhiye to hai ek rang ka asar ye bhi

hamare rone pe wo rashk-e-gul hansa kaisa

buton ko dun jo main har baat par KHuda ki qasam

ye kya samajhte hain yaro ki hai KHuda kaisa

wo din gae jo muKHatib zara wo hote the

ab un se nama-o-paigham ai saba kaisa

saqim-haal tha kuchh sham tak to ai 'arif'

wo raat ko nahin malum hai raha kaisa