asbab yahi hai yahi saman hamara

asbāb yahī hai yahī sāmān hamārā

chiḌiyoñ se mahaktā rahe dālān hamārā

har shaḳhs ko ḳhush-hālī kī dete haiñ duā.eñ

har shaḳhs hī kar jaatā hai nuqsān hamārā

har shaḳhs hī kyuuñ us ko miTāne pe tulā hai

dīvāroñ pe likkhā huā paimān hamārā

piite haiñ faqat saath nibhāne ke liye ham

har shaam ko ġham hotā hai mehmān hamārā

rahnā hai kisī aur ke qabze meñ hamesha

bhar saktā nahīñ koī bhī tāvān hamārā

is baat kā dukh hai ki ishāra nahīñ kaaTā

har moḌ pe hotā rahā chālān hamārā

har roz paḌe hote haiñ sab phuul zamīñ par

ye kaun girā detā hai gul-dān hamārā

asbab yahi hai yahi saman hamara

chiDiyon se mahakta rahe dalan hamara

har shaKHs ko KHush-haali ki dete hain duaen

har shaKHs hi kar jata hai nuqsan hamara

har shaKHs hi kyun us ko miTane pe tula hai

diwaron pe likkha hua paiman hamara

pite hain faqat sath nibhane ke liye hum

har sham ko gham hota hai mehman hamara

rahna hai kisi aur ke qabze mein hamesha

bhar sakta nahin koi bhi tawan hamara

is baat ka dukh hai ki ishaara nahin kaTa

har moD pe hota raha chaalan hamara

har roz paDe hote hain sab phul zamin par

ye kaun gira deta hai gul-dan hamara