ashkon mein qalam Dubo raha hai

ashkoñ meñ qalam Dubo rahā hai

fankār javān ho rahā hai

maqtal ke dikhā rahā hai manzar

kāġhaz ko lahū se dho rahā hai

zālim ko sikhā rahā hai insāf

patthar meñ daraḳht bo rahā hai

parbat se laḌā rahā hai āñkheñ

miTTī se tulūa ho rahā hai

haarī huī raat kā saverā

ġhunchoñ kī jabīñ bhigo rahā hai

zarre ko banā ke ek quvvat

ḳhud apnā maqām kho rahā hai

lohe ko ajal kī dhaar de kar

ḳhud is kā shikār ho rahā hai

mahloñ meñ nahīñ kisī ko ārām

fōt-pāth pe koī so rahā hai

chhūtā nahīñ Dar se phuul koī

kāñToñ ko koī piro rahā hai

ḳhandāñ haiñ galī galī sitāre

ghar ghar kā charāġh ro rahā hai

siine meñ koī ḳhayāl 'zulfī'

sūiyāñ sī chubho chubho rahā hai

ashkon mein qalam Dubo raha hai

fankar jawan ho raha hai

maqtal ke dikha raha hai manzar

kaghaz ko lahu se dho raha hai

zalim ko sikha raha hai insaf

patthar mein daraKHt bo raha hai

parbat se laDa raha hai aankhen

miTTi se tulua ho raha hai

haari hui raat ka sawera

ghunchon ki jabin bhigo raha hai

zarre ko bana ke ek quwwat

KHud apna maqam kho raha hai

lohe ko ajal ki dhaar de kar

KHud is ka shikar ho raha hai

mahlon mein nahin kisi ko aaram

foot-path pe koi so raha hai

chhuta nahin Dar se phul koi

kanTon ko koi piro raha hai

KHandan hain gali gali sitare

ghar ghar ka charagh ro raha hai

sine mein koi KHayal 'zulfi'

suiyan si chubho chubho raha hai