asir-e-lamha-e-maujud ho gae hum bhi

asīr-e-lamha-e-maujūd ho ga.e ham bhī

ḳhud apnī zaat ke saa.e meñ kho ga.e ham bhī

lagāo sang-e-sadā shīsha-e-sukūt pe aaj

zamāne vaalo pukāro ki so ga.e ham bhī

lage to shāḳh pe ik barg-e-zard kī mānind

gire to gard-e-hiqārat meñ kho ga.e ham bhī

na dekh paa.e haqīqat ke haul-nāk nuqūsh

hazār rang naqāboñ meñ kho ga.e ham bhī

hamārā zauq-e-suḳhan-goī sirf zauq na thā

ki ek ahd ko is meñ samo ga.e ham bhī

ġhamoñ kī dhaar vahī hai alam kī kaaT vahī

na jaane kaise 'ayāñ' kund ho ga.e ham bhī

asir-e-lamha-e-maujud ho gae hum bhi

KHud apni zat ke sae mein kho gae hum bhi

lagao sang-e-sada shisha-e-sukut pe aaj

zamane walo pukaro ki so gae hum bhi

lage to shaKH pe ek barg-e-zard ki manind

gire to gard-e-hiqarat mein kho gae hum bhi

na dekh pae haqiqat ke haul-nak nuqush

hazar rang naqabon mein kho gae hum bhi

hamara zauq-e-suKHan-goi sirf zauq na tha

ki ek ahd ko is mein samo gae hum bhi

ghamon ki dhaar wahi hai alam ki kaT wahi

na jaane kaise 'ayan' kund ho gae hum bhi