ata-e-barq ka muddat se jo nishana hai

'atā-e-barq kā muddat se jo nishāna hai

hai faḳhr mujh ko vo merā hī āshiyāna hai

jo bah rahā hai gulistāñ meñ hai lahū merā

jo jal rahā hai vo merā hī āshiyāna hai

mizāj-e-gesu-e-daurāñ kī ḳhair ho yārab

sunā hai dast-e-sitamgar meñ aaj shāna hai

hai sehr us kī nigāhoñ meñ yā fareb-e-nazar

magar ye sach hai ki Thahrā huā zamāna hai

vahī hai saare diloñ kī shikast kā bā'is

laboñ pe us ke tabassum jo fātehāna hai

tafakkurāt masā.ib alam ġham-e-jānāñ

sabhī ke lutf kā markaz ġharīb-ḳhāna hai

hai fard-e-jurm hī mere ḳhilāf ai 'abrār'

mizāj us kā ye sunte haiñ munsifāna hai

'ata-e-barq ka muddat se jo nishana hai

hai faKHr mujh ko wo mera hi aashiyana hai

jo bah raha hai gulistan mein hai lahu mera

jo jal raha hai wo mera hi aashiyana hai

mizaj-e-gesu-e-dauran ki KHair ho yarab

suna hai dast-e-sitamgar mein aaj shana hai

hai sehr us ki nigahon mein ya fareb-e-nazar

magar ye sach hai ki Thahra hua zamana hai

wahi hai sare dilon ki shikast ka ba'is

labon pe us ke tabassum jo fatehana hai

tafakkuraat masaib alam gham-e-jaanan

sabhi ke lutf ka markaz gharib-KHana hai

hai fard-e-jurm hi mere KHilaf ai 'abrar'

mizaj us ka ye sunte hain munsifana hai