auj-e-maqam-e-dost pe apna guzar kahan

auj-e-maqām-e-dost pe apnā guzar kahāñ

shāyān-e-sidra tā.ir-e-be-bāl-o-par kahāñ

tū hai ḳhayāl meñ to hai ārā.ish-e-ḳhayāl

tū hī na ho nazar meñ to zauq-e-nazar kahāñ

dekho jise vo mast-e-mai-e-kibr-o-nāz hai

duniyā bahut ḳharāb hai jaa.eñ magar kahāñ

hai ibtidā-e-shām se zulmāt kā safar

hotī hai dekhiye shab-e-ġham kī sahar kahāñ

taqdīr meñ hai us kī fishār-e-lahad vahī

tadbīr se uḌā bhī to pahuñchā bashar kahāñ

is be-ḳhudī meñ kis ko hai parvā ma.aal kī

maujūd mubtadā hī na ho to ḳhabar kahāñ

'mahrūm' kyā hī ḳhuub hai 'hālī' kī vo ġhazal

tujh se jahāñ meñ laakh sahī tū magar kahāñ

auj-e-maqam-e-dost pe apna guzar kahan

shayan-e-sidra tair-e-be-baal-o-par kahan

tu hai KHayal mein to hai aaraish-e-KHayal

tu hi na ho nazar mein to zauq-e-nazar kahan

dekho jise wo mast-e-mai-e-kibr-o-naz hai

duniya bahut KHarab hai jaen magar kahan

hai ibtida-e-sham se zulmat ka safar

hoti hai dekhiye shab-e-gham ki sahar kahan

taqdir mein hai us ki fishaar-e-lahad wahi

tadbir se uDa bhi to pahuncha bashar kahan

is be-KHudi mein kis ko hai parwa maal ki

maujud mubtada hi na ho to KHabar kahan

'mahrum' kya hi KHub hai 'haali' ki wo ghazal

tujh se jahan mein lakh sahi tu magar kahan