aur ab kya kahen ki kya hain hum

aur ab kyā kaheñ ki kyā haiñ ham

aap hī apne mudda.ā haiñ ham

apne āshiq haiñ apne vārafta

aap hī apne dil-rubā haiñ ham

aap hī ḳhāna aap ḳhāna-ḳhudā

aap hī apnī marhabā haiñ ham

ishq jo dil meñ dard ho ke rahā

ḳhud usī dard kī davā haiñ ham

rāz-e-dil kī tarah zamāne meñ

the chhupe aaj barmalā haiñ ham

kyuuñ na ho arsh par dimāġh apnā

kis ke kūche kī ḳhāk-e-pā haiñ ham

har koī āshnā samajhtā hai

aur yaañ kis ke āshnā haiñ ham

ibtidā kī bhī ibtidā haiñ ham

intihā kī bhī intihā haiñ ham

ham to bande 'nizām' un ke haiñ

vo bajā kahte haiñ ''ḳhudā haiñ ham''

aur ab kya kahen ki kya hain hum

aap hi apne muddaa hain hum

apne aashiq hain apne warafta

aap hi apne dil-ruba hain hum

aap hi KHana aap KHana-KHuda

aap hi apni marhaba hain hum

ishq jo dil mein dard ho ke raha

KHud usi dard ki dawa hain hum

raaz-e-dil ki tarah zamane mein

the chhupe aaj barmala hain hum

kyun na ho arsh par dimagh apna

kis ke kuche ki KHak-e-pa hain hum

har koi aashna samajhta hai

aur yan kis ke aashna hain hum

ibtida ki bhi ibtida hain hum

intiha ki bhi intiha hain hum

hum to bande 'nizam' un ke hain

wo baja kahte hain KHuda hain ham