aur ek shahr hai kya shahr-e-guman se aage

aur ik shahr hai kyā shahr-e-gumāñ se aage

ham ko jaanā hai bahut duur yahāñ se aage

gardish-e-pā kisī manzil pe Thahartī hī nahīñ

dil magar baḌhtā nahīñ kū-e-butāñ se aage

gūñjtī rahtī haiñ sāhil kī sadā.eñ har-dam

ham ne dekhā hī nahīñ mauj-e-ravāñ se aage

mudda.ā apnā kisī shaḳhs pe zāhir na huā

koī jaatā hī nahīñ tarz-e-bayāñ se aage

zaḳhm qaa.el hoñ bhalā chāragarī ke kaise

saf-e-dushman hai saf-e-chāra-garāñ se aage

be-sabab ham se ḳhafā ho ga.ī duniyā 'ālam'

ham ne likkhā hai kahāñ qissa-e-jāñ se aage

aur ek shahr hai kya shahr-e-guman se aage

hum ko jaana hai bahut dur yahan se aage

gardish-e-pa kisi manzil pe Thaharti hi nahin

dil magar baDhta nahin ku-e-butan se aage

gunjti rahti hain sahil ki sadaen har-dam

hum ne dekha hi nahin mauj-e-rawan se aage

muddaa apna kisi shaKHs pe zahir na hua

koi jata hi nahin tarz-e-bayan se aage

zaKHm qael hon bhala chaaragari ke kaise

saf-e-dushman hai saf-e-chaara-garan se aage

be-sabab hum se KHafa ho gai duniya 'alam'

hum ne likkha hai kahan qissa-e-jaan se aage