auron ki pyas aur hai aur uski pyas aur

auroñ kī pyaas aur hai aur us kī pyaas aur

kahtā hai har gilās pe bas ik gilās aur

ḳhud ko ka.ī baras se ye samjhā rahe haiñ ham

kaaTī hai itnī umr to do-chār maas aur

pahle hī kam hasīn kahāñ thā tumhārā ġham

pahnā diyā hai us ko ġhazal kā libās aur

Takrā rahī hai saañs mirī us kī saañs se

dil phir bhī de rahā hai sadā aur paas aur

allāh us kā lahja-e-shīrīñ ki kyā kahūñ

vallāh us pe urdu zabāñ kī miThās aur

bāñdhā hai ab naqāb to phir kas ke bāñdh le

ik ghūñT pī ke ye na ho baḌh jaa.e pyaas aur

'ġhālib' hayāt hote to karte ye e'tirāf

daur-e-'charāġh' meñ hai ġhazal kā class aur

auron ki pyas aur hai aur us ki pyas aur

kahta hai har gilas pe bas ek gilas aur

KHud ko kai baras se ye samjha rahe hain hum

kaTi hai itni umr to do-chaar mas aur

pahle hi kam hasin kahan tha tumhaara gham

pahna diya hai us ko ghazal ka libas aur

Takra rahi hai sans meri us ki sans se

dil phir bhi de raha hai sada aur pas aur

allah us ka lahja-e-shirin ki kya kahun

wallah us pe urdu zaban ki miThas aur

bandha hai ab naqab to phir kas ke bandh le

ek ghunT pi ke ye na ho baDh jae pyas aur

'ghaalib' hayat hote to karte ye e'tiraf

daur-e-'charagh' mein hai ghazal ka class aur