awwal awwal ki jawani mein ubaal aaya tha

avval avval kī javānī meñ ubaal aayā thā

baad meñ jā ke kahīñ zabt-e-kamāl aayā thā

mere vijdān ne bar-vaqt batāyā thā mujhe

hijr kā ḳhvāb mujhe vaqt-e-visāl aayā thā

kū-ba-kū phail ga.ī us ke badan kī ḳhushbū

saaf lagtā hai vahī zohra-jamāl aayā thā

ḳhud ko paane ke liye ḳhud meñ utar kar apne

bahr-o-bar haath kī chhalnī meñ khañgāl aayā thā

vaqt ke jabr kī dahlīz pe baiThā jis dam

ġham kī tahrīk se ḳhushiyoñ pe zavāl aayā thā

ab to ahbāb bhī dam bhar ko ThiThuk jaate haiñ

jab maiñ aayā thā yahāñ kitnā nihāl aayā thā

'ābdī' kaun batā.egā mire baad use

Dūbte vaqt mujhe us kā ḳhayāl aayā thā

awwal awwal ki jawani mein ubaal aaya tha

baad mein ja ke kahin zabt-e-kamal aaya tha

mere wijdan ne bar-waqt bataya tha mujhe

hijr ka KHwab mujhe waqt-e-visal aaya tha

ku-ba-ku phail gai us ke badan ki KHushbu

saf lagta hai wahi zohra-jamal aaya tha

KHud ko pane ke liye KHud mein utar kar apne

bahr-o-bar hath ki chhalni mein khangal aaya tha

waqt ke jabr ki dahliz pe baiTha jis dam

gham ki tahrik se KHushiyon pe zawal aaya tha

ab to ahbab bhi dam bhar ko ThiThuk jate hain

jab main aaya tha yahan kitna nihaal aaya tha

'abdi' kaun bataega mere baad use

Dubte waqt mujhe us ka KHayal aaya tha