ayan ho rang mein aur misl-e-bu gul mein nihan bhi ho

ayaañ ho rañg meñ aur misl-e-bū gul meñ nihāñ bhī ho

jahān-e-jāñ hue gul-pairahan jān-e-jahāñ bhī ho

makīñ kaunain meñ ho fil-haqīqat lā-makāñ bhī ho

azal se tā-abad qaa.em ayaañ bhī ho nihāñ bhī ho

par-e-parvāz-e-anqā lā.eñge gar lā-makāñ bhī ho

tumheñ ham DhūñDh lā.eñge kahīñ bhī ho jahāñ bhī ho

kahāñ haiñ hazrat-e-īsā kahāñ haiñ hazrat-e-mūsā

ayaañ e.ajāz meñ ho aur tajallī meñ nihāñ bhī ho

ġhashī ho aur ġhashī meñ hosh bhī kuchh kuchh rahe baaqī

vo husn-e-lā-yazālī kuchh ayaañ bhī kuchh nihāñ bhī ho

jalānā mārnā e.ajāz hai us chashm-e-pur-fan kā

hayāt-e-jāvidāñ ho aur marg-e-nā-gahāñ bhī ho

jo āñkheñ hoñ to husn-o-ishq kī sūrat nazar aa.e

ayaañ ho rañg-e-gul meñ saut-e-bulbul meñ nihāñ bhī ho

yahāñ dair-o-haram meñ ho vahāñ mai-ḳhāne meñ 'sāhir'

barahman ho janāb-e-shaiḳh ho pīr-e-muġhāñ bhī ho

ayan ho rang mein aur misl-e-bu gul mein nihan bhi ho

jahan-e-jaan hue gul-pairahan jaan-e-jahan bhi ho

makin kaunain mein ho fil-haqiqat la-makan bhi ho

azal se ta-abad qaem ayan bhi ho nihan bhi ho

par-e-parwaz-e-anqa laenge gar la-makan bhi ho

tumhein hum DhunDh laenge kahin bhi ho jahan bhi ho

kahan hain hazrat-e-isa kahan hain hazrat-e-musa

ayan eajaz mein ho aur tajalli mein nihan bhi ho

ghashi ho aur ghashi mein hosh bhi kuchh kuchh rahe baqi

wo husn-e-la-yazali kuchh ayan bhi kuchh nihan bhi ho

jalana marna eajaz hai us chashm-e-pur-fan ka

hayat-e-jawidan ho aur marg-e-na-gahan bhi ho

jo aankhen hon to husn-o-ishq ki surat nazar aae

ayan ho rang-e-gul mein saut-e-bulbul mein nihan bhi ho

yahan dair-o-haram mein ho wahan mai-KHane mein 'sahir'

barahman ho janab-e-shaiKH ho pir-e-mughan bhi ho