azab-e-zindagi jab bhi raqam nahin hota

'azāb-e-zindagī jab bhī raqam nahīñ hotā

vo lamha maut se bilkul bhī kam nahīñ hotā

hamāre haath kisī ko dikhā.ī kaise deñ

hamāre haath meñ koī 'alam nahīñ hotā

bahut se log haiñ jin se nahīñ milā huuñ maiñ

zarā bhī un se na milne kā ġham nahīñ hotā

hamārī baat kā un par koī javāb nahīñ

hamārā sar bhī to un se qalam nahīñ hotā

hazār us ne sitam ham pe jab kiye to khulā

ki ab to ham se bhī koī karam nahīñ hotā

'azab-e-zindagi jab bhi raqam nahin hota

wo lamha maut se bilkul bhi kam nahin hota

hamare hath kisi ko dikhai kaise den

hamare hath mein koi 'alam nahin hota

bahut se log hain jin se nahin mila hun main

zara bhi un se na milne ka gham nahin hota

hamari baat ka un par koi jawab nahin

hamara sar bhi to un se qalam nahin hota

hazar us ne sitam hum pe jab kiye to khula

ki ab to hum se bhi koi karam nahin hota