azab TuTe dilon ko har ek nafas guzra

azaab TuuTe diloñ ko har ik nafas guzrā

shikasta-pā the garāñ muzhda-e-jaras guzrā

hujūm-e-jalva-o-nairañgī-e-tamannā se

tamām mausam-e-gul mausam-e-havas guzrā

ajab nahīñ ki hayāt-e-davām bhī baḳhshe

vo ek lamha-e-furqat jo ik baras guzrā

ye maslahat ki kahīñ dahr hai kahīñ firdaus

vahī jo ālam-e-dil ham pe ham-nafas guzrā

ġham-e-ma.āl rahā arz-e-shauq se pahle

is ek baat pe kyā kyā na pesh-o-pas guzrā

kashākash-e-ġham-e-āzādī-o-asīrī meñ

har āshiyāñ pe koī ālam-e-qafas guzrā

rah-e-talab meñ haiñ dar-māñda rāhbar 'tābish'

yahī hai haal to ye qāfila bhī bas guzrā

azab TuTe dilon ko har ek nafas guzra

shikasta-pa the garan muzhda-e-jaras guzra

hujum-e-jalwa-o-nairangi-e-tamanna se

tamam mausam-e-gul mausam-e-hawas guzra

ajab nahin ki hayat-e-dawam bhi baKHshe

wo ek lamha-e-furqat jo ek baras guzra

ye maslahat ki kahin dahr hai kahin firdaus

wahi jo aalam-e-dil hum pe ham-nafas guzra

gham-e-maal raha arz-e-shauq se pahle

is ek baat pe kya kya na pesh-o-pas guzra

kashakash-e-gham-e-azadi-o-asiri mein

har aashiyan pe koi aalam-e-qafas guzra

rah-e-talab mein hain dar-manda rahbar 'tabish'

yahi hai haal to ye qafila bhi bas guzra